- بحبك أه
- وأه منِّك
- وأه يا حبيبتي من حبِّك
- ومن قربك
- ومن بعدك
- ومن حرّك
- ومن بردك
- ومن حضنك
- ومن صدّك
- بيحييني ويقتلني
- ويبنيني ويهدمني
- يفوّقني ويسكرني
- وانا العايش عشان اسكر
- أعيش بيكي ساعات ف اليوم
- واموت منِّك ساعات اكتر
- ولمّا الطعم يتمرر
- أحب السهره ع الكورنيش
- وحلقة ذِكر ف الأزهر
- واحب روايح الجنّه
- ف عطر بخورك العنبر
- ف ليه قلبِك بيستخسر
- يحن عليّا بالكلمه ؟
- د انا باحلف على النعمه
- ما قلبي ف يوم عشق غيرك
- ولو جوّاكي لغز الكون
- ف قلبي ح يبقى تفسيرك
- م انا حلمِك وتأويلِك
- وانا المطروح بطول نيلِك
- وعرقي ف الغيطان يروي
- سنابل قمحك الدهبي
- ونخل الدوم
- وشجر التين
- ويروي الخُضره ع الجنبين
- ف ليه حسباني م الملاعين
- وحرماني أدوق خيرِك ؟
- د انا نسر السما طيرك
- وانا أسد الميدان إبنك
- وانا اللي دفعتلك مهرك
- وانا وقت الأدان الصوت
- وانا المرمي ف كمين الموت
- عشان احميكي م الضلمه
- وم العتمه
- وم الخفافيش
- ف ليه راشقه الجراح فيّا
- ونازعه من جناحي الريش ؟
- وليه رمياني برّه الباب
- وانا اللي ف حبِّك الدرويش ؟
- وليه بتسيبي غيري يعيش
- على دمّي
- على لحمي
- على عضمي
- ولمّا دموعي تتسرسب
- تشوفي دموعي تبتسمي !!
- د انا رغم العذاب عايش
- واقول رغم الوجع ..
- أمّي
- وباحمد ربّي ع النعمه
- وإنتي بدمّي تتحمّي
- أفتّح عيني واحميكي
- تجيبي قماشه وتغمّي
- أموت وتدوسي ما تسمّي
- على لحمي اللي متوزّع
- على الأسفلت والرمله
- بدون قوّه
- بدون حولا
- كأنِّك داخله ف مقاوله
- وانا الجسم اللي متبعتر
- وانا الصوت
- اللي من غير صوت
- وانا الضحكه اللي مدبوحه
- وانا الصرخه اللي ف الملكوت
- بتسأل إيه جنيته عشان
- أكون ف غرامك الهيمان
- واكون قربان ..
- كمين الموت
- سيد منيرعطيه
- عضو اتحاد كتاب مصر
- من ديوان (دقي يا مزيكا)
***********************
***********************
ليست هناك تعليقات:
إرسال تعليق