إن شفت طير السما بيغنى غنى وراه
غناه دعا لربنا فى الصبح أو فى مساه
ماهو كل شئ فى الكون بيسبح الرحمن
ولكل عاشق لغة ولسان لحمد الله
خد م الحياه فرحك قبل الحياه ما تروح
دا كل يوم ينقضى من عمرنا مطروح
ما لناش خيار فى القضا والوعد والمكتوب
دنيا وحالها كده نيجى وغيرنا يروح
الدنيا رحلة سفر ايامها معدوده
وساعاتها مهما صفت أحزانها موجوده
لا منها ينفع حذر ولا ظلمها بيرحم
إلاّ إللى بات م الورع دمعه على خدوده
قصور كتير اتبنت أصحابها راحت فين
تحت التراب اختفت رجعت لأصل الطين
مافيش خلود للبشر ولا دوام للكون
ما دايم إلاّ القوى رب العباد والدين
افتح كتاب الزمن اقرى إللى فات ترتاح
فيه اللى مات م الشبع والضحك والأفراح
واللى سقاه الوجع كاس العذاب المر
تحت التراب اندفن والعبرة باللى ارتاح
***********************
***********************
ليست هناك تعليقات:
إرسال تعليق