من ديوان ولسه بحلم بفجر
للشاعر مصطفى فريد
المسألة مش معضلة
ولاعايزه حاوى يقول جلا
ولا محتاجين للمنقله
ترسم زوايا الهرجله
قوم بس حى على الصلا
واسجد لربك فى الخلا
وكفايه رقص ومهزله
يا أمه خلقت للعلا
قدام عنينا اللى انصلى
فى النار وروحه مسلسله
والبنت أم المريله
عدموها من غير محكمه
والدم فوق المقصله
بإدين يهود متأصلة
فيها الخيانة المخجلة
ردد حروف البسمله
واحنا آخرنا البلبلة
ندين ونشجب يا هلا
وكإن اصل المشكله
ما تخصناش ولا فيه صله
بين اللى مات وقت الصلا
وصوت آدان ضاع فى الخلا
الكيل طفح والمسألة
محتاجه تغيير مرحلة
مش بالصاجات والصهلله
جوه الملاهى الموحله
ولا بالعويل والولوله
على طفل مات او ارمله
يا أمه صبحت مهمله
فرقتنا هى المشكله
والنصر لاجل ما ينجلى
لابد نرجع للصلا
***********************
***********************
ليست هناك تعليقات:
إرسال تعليق