بصمت وياك عهدي
ومافشيت اسرار
اجيك اني بمحنة وشوگ
طير وهجر... عشه
كحل بالسهر رمشه
يدور عالأمان الضاع
وحشه الدرب ومشيته
گطعت اني الحواجز
ماردت اسوار
مايغفه السهر بالعين
أناطر بيك صبحي الغاب
عنك غاب گلبي
وبالگلب مشوار
الندم ميفيد..
لا ..مااقبل الاعذار
رسمتك لوحة مودعين
طاسة ماي
تنطش
خضار الدرب بيه افياي
وطيفك يرسم الخطوة
أمل مفقود
بلكي تعود
لو نسمة وتجي بصيهود
بغيابك
اسيرة الروح مخنوگة
بعتبة الدار
أزيدك والعلم لليدري..
فشلة وعيب
يوم الفارگت
لمحات وجهك بي
شلعت الدار وعروگه
وبقيت احلم وأفز ..
عشرين جرح ويوم
وكل دگه وجرس..
اركض على البيبان
واشوف جفوف مطبوعة
وأبوس الباب
بلكي يكون...
موعد عودتك قد حان.
الشاعر عبدالرحمن الباز
2017/8/4
***********************
***********************
ليست هناك تعليقات:
إرسال تعليق