قصيدة - دراع الموت - اهداء الى صديقى عمرو حسنى - كلمات والقاء - سيد منيرعطيه

قصيدة -دراع الموات -إهداء الى صديقي عمرو حسنى -كلمات والقاء - سيد منيرعطيه من ديوان - على نص سطر إلى صديقي عمرو حسني دراع الموت .............. بداية القول .. ح اقول عبله وح اشرح تبقى مين عبله ؟ ورغم الشرح مش ح اوفي ولا ح اقدر أوصّل كُل إحساسي دي كانت عزوتي وناسي وكانت كل شئ ف الكون وكانت معنى للأيام ولو دمّي ح يبقى كلام أكيد كل السطور ح تكون حروف عبله دي خالتي اللي ابتديت بيها وبيها حياتي متصله ف حرف العين .. عيون بتسمّي وتصلّي وترقيني وتحرسني بحول الله وحرف الباء .. ببان مفتوحه لعيوني وزرعالي ف طريقي حياه وحرف اللام .. ليالي كتيرعليها تفوت بتسهرها عشان راحتي ولو نسمة هوا عدّت تخاف لتهز تسريحتي ولمّا الدنيا بتشتّي بتاء مربوطه تحميني تدفّيني تكون أمّي بمعنى الأم ورغم ان الصحيح خالتي ياست الكل دلوقتي انا توهت بسبب بُعدك وبعدك مش لاقيلي أمان لا عاد أحضان بتحميني ولا شايف ف قلب حنان ما يفرقشي مع العالم أنام بردان أنام عطشان أبات عريان وتايه حتى من نفسي لكن فاكر ليالي زمان وفاكر حضنك الدافي وفاكر دعوتِك ليّا وانا صاحي وانا نايم وانا ماشي ياريت الموت ما عدّاشي ولا أخدك بعيد عنّي ياريته كان دخل حضني أو اختارني وكان سابك لكن حكم القدر صابك ف سامحيني عشان دايما بتحميني لكني عجزت يا خالتي أحوش عنّك .. دراع الموت سيد منيرعطيه عضو اتحاد كتاب مصر من انتاج جمعية رابطة عزف الـأقلام العربية

***********************

***********************