لمّا تعشق ..
خد نفس م الحب واوعى
يوم تردُّه
أي باب للبُعد سدُّه
وانت ح تعيش فوق حياتك
عمر اكبر من سنينك
ألف مرّه
كل حاجه انشالله مُرّه
رح تكون بالحب سكر
خد نفس م الحب واسكر
وابتدي تفتح وريدك
للحبيب يتدارى جوّه
كون تمللي حضن أدم
إللي كان الكون لحوّا
واوعى تفتح باب لغيره
دي الرياح ف الغيره نوّه
تهدم البنيان وتهدم
معبد الاحلام ف ليله
إوعى تبقى ف لحظه ساذج
أو تكون شمشون دليله
دي البدايه الساذجه توصل
للنهايه المستحيله
وانت لسّه ف أولى بادئ
يعني لسّه سنين طويله
لو عايزها تكون جميله
خلّي أحضانك مواني
خلّي جوّه القلب مرسى
صب من أبريق مشاعرك
والحبيبه ح تبقى حسّه
مهما تشبع برضه لسّه
طعم أجمل م اللي فات
رح يفيدك بكره حتما
لمّا تقرا الذكريات
إرمي طعم المُر برّه
لم شهد من الساعات
دي الحياه سكّر نبات
لمّا بالأشواق نحلي
إبني جوّه القلب معبد
للغرام والحب صلّي
إوعى م الأوهام تخلّي
ركن ضلمه يداري شوفك
إصنع الضي المناسب
واللي يتحمّل ظروفك
واما تمشي ف سكّه عتمه
إمشي دوغري وداري خوفك
إوعى حد ف يوم يشوفك
وانت مدبوح المشاعر
خلّي جرحك يبقى مخفي
خلّي قلبك قلب شاعر
يصنع الحلم المغاير
لمّا ينطق بس كلمه
يمشي وبنبضه المغنّي
مهما تبقى السكه ضلمه
خلّي قلبك يبقى نجمه
تحدف الضي المباغت
فوق رصيف الإنهيار
يومها تبقى الدنيا جنّه
مهما كان ف الأرض نار
خلّي قلبك باختصار
يبقى وقت الشِدّه أب
يبقى وقت الحب حب
يبقى وقت الضعف إبن
يبقى وقت الطيبه أم
رح تشوف للدنيا معنى
رح تشوفها بلون وطعم
حتى لمّا كابوس يزورك
رح يشدّك ألف حلم
بس صدّقني الأهم
رح تعيش من بعد عمرك
عمر تاني
عمر تالت
عمر ألف
طول ما نازله الدنيا لف
رح تكون عنوان لقصه
ما انتهتش
سيد منيرعطيه
عضو اتحاد كتاب مصر
من ديوان (عامود دخان)
***********************
***********************
ليست هناك تعليقات:
إرسال تعليق