لمّا القلوب الطيّبه
تشعر وجع
بيزيد ف إحساسها الحنين
جايز تسلّي نفسها
بحكايه من فعل الخيال
حدّوته قابله الإحتمال
أو شئ مُحال
أو حاجة واقفه بين بينين
جايز تسافر بالسنين
ف حواري ذكرى بدون سبب
أو حتى تختار العجب
وتلم كراكيب اللي فات
وتروح تزور بكره اللي جي
جايز تعيد ميّت قديم
وتكلّمه على إنّه حي
جايز تعود شايله المرار
والإنهزام
والإنكسار
جايز كمان ..
تختار ف لحظه تنزوي
أو تستخبّى ف الضلوع
تعطش تجوع
تاكل عذاب
تشرب دموع
لكنها عاشقه الحياه
ما تموتش مهما القهر زاد
والجرح زاد
والمُر زاد
دايما بتاخد م الأمل
حتى ف عز اليأس زاد
طبع القلوب زي البلاد
تدخل حروب مالهاش لزوم
ولا ليها حتى فيها يد
وارد تدوق ف الجد هزل
والهزل جد
وارد عليها تنهزم
أو تنهدم زي الجبال
وارد حصونها تتفتح
وارد تقع ف الإحتلال
لكن أكيد ..
مهما السنين بتزيد وجع
بتعيش وبيموت الوجع
زي الحقايق مهما كان
بتبان ..
وتمحي المصطنع
والحلم لو لحظه اتمنع
النبض قادر من جديد
يزرع شجر أحلام كتير
لو حتى كان مجروح ضعيف
قادر يجيب ورد الربيع
من قلب صبّار الخريف
ويخطّي إحساسه المخيف
علشان يسلّم ضحكتين
لعيون حزينه ف سكّتُه
ويمد إيده لطفل باكي يسكّتُه
بالطبطبه
طبع القلوب الطيّبه
مهما يزيد فيها الوجع
بتمد إيدها للجميع
وبتبتسم
سيد منيرعطيه
عضو اتحاد كتاب مصر
من ديوان قلبي مجرم
***********************
***********************
ليست هناك تعليقات:
إرسال تعليق