باشوف الشمس ف عيونك
واشوفك بين عيون الشمس
وباحتار مين طلع من مين
عيونك م النهار بصّين
أو الصبح اللي منك بص ؟
باشوفك بانقسم بالنص
وباتبعتر بهزل وجد
مابين طاير بألف جناح
وبين عاشق وقع ع الأرض
وبين غرقان ف بحر كبير
ومتطوّح ف جزر ومد
وابات مؤمن بكل الشوق
واشوف قلبك يبات مرتد
أكلّم قلبي من غيرك
ألاقي القلب فجأه احتد
عشان حُبّه اللي فاق الحد
وصل حد السما الأولى
وراح بيزغزغ الغيامات
ف تنزل مطرة الأشواق
ترشرش ع الورود فراشات
وتملا الدنيا بالألوان
وبات قلب الحجر إنسان
بيعشق كل شكل جميل
ف يبقى أكيد وقلبي ملاك
على حُسنك قوام ح يميل
يغازل فيكي كل صباح
يسامر فيكي طول الليل
ولمّا ينام ..
يشوفك كل أحلامه
ولمّا يقوم
يلاقي عيونك التأويل
ويحتار كل ما يشوفك
إذا كنتي ف عيون الشمس
أو الشمس اللي ف عيونك
أكيد قلبي اللي كان عاقل
صبح بالحب مجنونك
صبح بيدق بحروفك
وطول الليل يكررها
ف صارت وِرد ف لسانه
وصارت وِرد ف لساني
طبيعي حياتي تبقى انتي
كأني باتولد تاني
طبيعي ما اتوهش بعد اليوم
مدام ف الحب عنواني
سيد منير عطيه
***********************
***********************
مبدع ديما يافناز
ردحذف