طب جربى تكونى وطن
وإدينى صدرك
لو حتى مرة انام عليه
أنا نفسى أحس
إنى إليكى بأنتمى
محتاج لحُضنك
نفسى مرة أترمى
الاقينى
بأتلف فى علم
والاقينى
فى عز الالم
إنسان ومن ضمن البشر
لو كان بأيدى
كنت اشتريلى
ألف حضن يضمنى
كنت اشتريلى تخته
جوة المدرسة
كنت اشتريلى
ألف حوش
بس إبعدى عنى
الوحوش
وأوعدينى
بالأمانى الطيبه
سيبانى صحرا
ودافنه جوايا الصبا
سيبانى شجرة يابسه
إخضّرْ لونى
وأتحرمت من الثمار
عاملانى ريشة
فى الهوا متغمى
مش شايف القرار
عاملانى نار
تاكل خضار كل البشر
عملانى شمعة
نورها دايما منطفى
طب جربينى وأفهمى
إبنك معمروش كان غبى
إبنك أصيل من نبت نيل
عمرة ما يعرف مستحيل
إدينى فاس
وإدينى كام ورقه وقلم
خلينى أزرع كل بور
وأرفع فى صحاريكى العلم
بس إثبتى
إنى اليكى بأنتمى
وإنك أمان
لىَّ يا بلدى فى دنيتى
ولحد ما الليل الحزين
يطرح نهار
عمرى ما هقبل فى اللى عدى
إعتزار
بس اللى لازم تعرفية
واللى أنتِ
وصلتينى ليه
إنى بأعيش من غير وطن
بأحلم بحضنك والسكن
بأحلم يخاصمنى الشحن
بأحلم اكون انسان جديد
مفروش لى ورد ف سكتى
بأتمنى اصالح دنيتى
قبل الاوان
محتاج اكون فارس
ولا يسعنيش ميدان
محتاج صراحه ف بسمتك
محتاج ادوق حنيتك
زى الغريب
لما حبيبتى بتفتحى ليه الديار
وتقدميله الاوسمه
محبط انا
وحزنى بيكفى البشر
يللى انت حاجبة الصوت
على مر الزمان
الفجر لسه بينتظر
صوت الادان
***********************
***********************
ليست هناك تعليقات:
إرسال تعليق