منزلة الحال,,,,,,,,,,,بقلم الشاعر محمد حديش

منزلة الحال (زجل مغربي)
*************

 الكلام خارج حروف
 ورد وريحان ؤعود
 قماري لمحبوبي
 هديتو ليه معطر
السر دوا من حروف
 الرموش سحر زين
 نور الگمرة ضواها
شوفتو ليا تهز ربيع
المحبة ورود نهديها
ياك كيسان العشق
محلاها معاك شربناها
ؤزينك نور بهى الغرام
 ورد ؤمسك غطاها
انا ليك يامحبوبي
ما نخون عهدك
وخا تلاقا الجبال وترابها
دارت لليام تكرصات
تغرب الكلام ؤتخبل
كبت خيوط التخمام
المنزلة تقلب ميزانها
 توضر ريق النغمة
ؤتحير الزمان مع هبال
المغطي الفوق
ؤالمعري سيگان
والغرام لبس حال
 الجدبة شدو الحال
 وهيجو المكان
يا ناس انا براني
 ف زمان تلف ركاني
الجد ركبوه بردعة
 ؤشواري أدلالي
ؤالبحر نشف ملح
 تراب ماه ما رماني
غير كية كحل الراس
 رجعتني مگروح
ف بلادي تطحن
حقي كرطو صوالدي
ماني فقيه حكيم
 ولا علام غير حال
 زماني حير البال
تمنيت نشوف
 الصفا ولو خيال
ما شي حلمة تالفا
ف نعاس نكست الفال
مني يهلل محبوبي
يخفاف ثقل همومي
تزهى البسمة فرحة
من الگلب طالعا صفا
يتنسى الهم وتعكال ليام
العطفة ف الگلب نعمة
توگض الفرح من الرگاد

بقلم محمد حديش
م͠ج͠د͠و͠ب͠ آ͠ل͠ح͠رف͠
18\11\2018

***********************

***********************