وفيت وياك تدريني
عشگ صفصاف
شما گصوا بجذره
نابت بطيني
ابروحي الخضرت بالشيب
ماشربت الماي
بفرة الناعور
وانه بريجي عطش
واشرب سراب اوعود
اجر الليل صفنة
واشهگگ معذور
حال الاه حسرة
وتكشف المستور
ادز نذور
طيفك والحلم معگود
وبجيدي العلگ
بالصفنة ظل مشدود
حسبتك ضوة لملگاي
تجافبني بعذر خجلان
عذر الماوفه بدينه
رغم صوت الصدى من ابعيد
بأذني يتيه مرة
ومرة بيه يريد
احن للناي
من يعزف بسليني
ظلمة الروح بغيابك
اتقاسم ضواك
بخنگة مودعين
ومامطرت غيومك
حتى ترويني
نصك مو الي
يل مااجيت أوياي
حصتي وياك ضاعت
وانته ناسيني
تجيني وجرحي توة يطيب
جرحي البية منك حيل ياذيني
وأشوفك تبتعد
وجرحي الك يشتاگ
وحضنك طيف...
ثاري احضن بسچيني
لا انت البقيت اوياي
أكابر
والسنين بعوز تچويني
وماحسبت نصحك
چان ليه فراگ
يل مالك عذر
واشلون تقريني.
عبدالرحمن الباز
2017/10/10
***********************
***********************
ليست هناك تعليقات:
إرسال تعليق