ولسه ياما هتشوفو
بدال مينا صبح منهم
واحمس راح يطمنهم
بإن النيل
طلب حق اللجؤ ليهم
وإن الطين صبح حلمه
يموت ظلمه على إيديهم
وإن الحب طب قتيل
ومنديل الوجع حاوى
وإن الود كتفناه
وسلمناه لعشماوى
وإن الجد مش ناوى
يداوى جرح عروبتنا
وإن الخيبه ربتنا على الغالى
وإن العالى بقى واطى
وكل دقيقه بنطاطى
وضاع المجد يا ولداه
ولطمت آه على خدودها
من إللى مرروا ذادها
يوماتى القهر يجلدها وتترجاه
وتاه الكل فى بطاقه
لافيها دعم ولا طاقه
وألف خناقه منصوبه
مابين الفقر والتبزير
وإن الخير نشف ريقه
وضل طريقه جوانا
وإن الشر سوانا على الجنبين
وإن العدل فى الموازين
حزين على عمره وشبابه
وإن اليأس شرشابه
بينطح فى السحاب والغيم
وضحك الجهل ع التعليم
بتعميره ...وكوز بيره ...
وكاس خمره ...
وسهره حمره محبوكه
تميل القصه ع الطوكه وتتكا
وعكا عكرت رمسيس
وطفح الشرم فى مارينا
نسينا الدين
وجبنا المستحيل م الصين
وقوانين العمى المطحون
فى هون مينا
بتهرب من بلاوينا
وتترجا بلاويهم
وترشيهم
بدولة عدلها محتل
وسابو الحل لظروفه
ولسه ياما هتشوفو
***********************
***********************
ليست هناك تعليقات:
إرسال تعليق