ماشى فى عكس الاتجاه
بابحث لى طوق للنجاه
عن اى معنى يشدنى يم الامل
يربطنى تانى بالحياه
تاهت خطاوى سكتى رغم الحذر
مين اللى قال ان الحذر يمنع قدر
كل اللى حاصل لى نصيب
أمر وصدر
وده المقدر ف الحياه
امشى فى عكس الاتجاه
ءءء
ياخطوه تايهه عن السبيل
متشوقه لشوف الدليل
دارت ولفت ف الزمن
عرفت بداية المستحيل
وقفت قصاده ماهمهاش
ركبت على كتاف الامل
سابها الامل تانى وماجاش
تاه الطريق ويا الدليل
وانا اللى بينهم عمرى تاه
ماشى ف عكس الاتجاه
ءءء
افرد شراعك يازمن
او شوف لى بر
رسيني مره عالطريق
لو كان خطر
وصلنى يوم للمشتهى
وللا خلاص عمرى انتهى
بحكم القدر
طب ايه نهاية رحلتى
وايه جزات اللى صبر
انا اللى تايه ف الزمن
بين اللى فات واللى مضى
وبين سنين عمر انقضى
حاربت طواحين الهوا .. ولاهمنيش
دورت فيها عالامل
وحلم عمره مااكتمل ..وازاى اعيش
فى وقت ماعرفتش مداه
ءءء
كل اللى انا قدرت اعمله
وحلمت مره اكمله
ومسكت يومها الخيط
حتى ماكنش ف اولهّ
ومشيت ف عكس الاتجاه
يمكن ف يوم افهم ياناس
قيمة وجودى ف الحياه
والقى طريقى للنجاه
مايكونش عكس الاتجاه
***********************
***********************
ليست هناك تعليقات:
إرسال تعليق