يا (جبرتى)
قوم وحلل كل خيط فى اللعبه ديا
شوفت نابليون ومكره
قارى قرآنى ومذاكره
شكله مصلح خافى غدره
جوه سبحه وجلابيه
جاب جنود زى الجراد
جن مخ البيك مراد
أرهبوا كل العباد
دخلوا جوه الرحمانيه
شبراخيت فى الحرب فوضى
قلب إمبابه بيرجف
هربت المماليك فى غمضه
لما جند فرنسا يزحف
ع المقطم فيه مدافع
دنسوا الأزهر فى تكه
ربى كان هوا المدافع
حرمه من فتح عكا
قوم يا نابليون بسرعه
روح على بلادك يا سكه
يا رشيد حجرك بيشهد
بالحضاره الفرعونيه
أى نار جواها نورها
حط لاستعمار بذورها
فى المحاكم والمطابع والقوانين اللى هيا
ياللى جاى طمعان فى خيرها
روح اقرى تاريخ بهيه
يا فرنسى...... يا (كليبر)
انت ميت .......... مصر حيه
تظلموا فى كل كائن
و(سليمان) كان الضحيه
أعدموه ف تل العقارب
والتاريخ واعى ....... ماغايب
راسه فى المتحف أبيه
خنجره المسموم فى قلبك
كل عربى قام يحاربك
ياسفيه........ أرضى عفيه
مهما طال ليل المظالم
القمر حتما هايطلع
الليالى الحلوه جايه
الليالى الحلوه جايه
***********************
***********************
ليست هناك تعليقات:
إرسال تعليق