بحب الليل عشان بسكن
تحت جناحه فى الآخر
يقوم الليل يطير بدري
ويكشفنى على الآخر
وتيجى الشمس تخبطنى
تسويني على الجنبين
وتحدفنى نهار بارد
وقبل الليل ما يغطى
سما مرسومه بالالوان
تروح شمسنا الجرحه
وتسحبنى من الاحزان
من الهيصه ..
من الدوشه ..
من اوجاع بقالها زمان
بفكر انى محلمشى
عشان أحلامي دى نادره
واسيب الحلم يحلمنى
واسيب الفكره تسحبني
لعالم تانى م الاخر
وامشى وراها ما اندمشى
جايز يمكن يكون جايز
عقلى اصلو مش عايز
يعيش حلمه على الذكرى
ويتعكز على بكره
يلاقى بكره قام وقع
يوقعنى على فكره
تفوقنى على واقع
واقوم أسند علي نهارى
ألاقى جداره دى هشه
فيسندنى الهوا السارح
يعدى اليوم كده بسرعه
ويجيى الليل بيتمرجح
وشكله غريب
بلون أسمر وشعر ابيض
بدون تجاعيد
بيتفس وجع تنهيد
بيشبه طير كان سارح
فى مُلك الله ..وفجأه اتاه
يقين ينزل على غصنى
ف يتحكم في اقداري
وأنا فكرى إنه جاى نجاه
شاعرة الاسماعيلية/ صابحه ابوزيد
***********************
***********************
ليست هناك تعليقات:
إرسال تعليق