دنيا حلمها كداب
....................
حاولت كتير أسيب الشعر واهاجر
و اسيبه ازاى وانا ماسك بتلابيبه
وهو كمان
حاولت اسيبه من امبارح ومش بكره
لكن فكره تجيب فكره
تسلم قلبى للذكرى
فالاقى الفكر يكتب كلمتين
والاقى العين تحس القلب
فتتالم بكام دمعه على الخدين
حاولت كتير
لكن ما قدرت
ومين يقدر مع الفكره يعيش ساكن
يعيش ساكت
بلا احساس
فى وسط الناس
وفى العيشه اللى عايشنها بتتغير
مع الإحساس
تلاقى الكلمه
بتخفف هموم الناس
بترسم م الألم حاله
ساعات الكلمه بتداوى
جروح الناس
ساعات بلسم على جراحهم
ساعات تجرح قلوب الناس
لكن بالكلمه والإحساس
انا عايش بنبض الناس
باجاهد نفسى والعالم
وباتحمل هموم اكدار ما تتحمل
وباصمد لما كل الدنيا تتآمر
ولما الهم يتكاتر
ولما الحزن يحاوطنى
فيذبحنى وانا صابر
وباكتب كلمتين بالصبر باتصابر
واحلم ان بكره جميل
مفيش احزان ولا اكدار
واصحى وحلمى بندور على إللى كان
فيهرب حلمنا منا وبيغادر
زمن غادر
لكننا فيه بنتصابر وبنثابر
واهى عيشه وعايشنها
فى دنيا حلمها كداب
تنادى علينا بالفرحه
نروح نجرى نلاقى عذاب
ونتلاقى فى يوم حاضر
وتكتبنا تملى غياب !!!
# ايمن أبو الدنيا #
***********************
***********************
ليست هناك تعليقات:
إرسال تعليق