انت فين يا بعيله
يا غالى عليا
من زمان ما شفت صورتك
فين كلامك فين سلامك
فين هيامك بالصبيه
شعرك الزايد جماله
ويا بسمات الصحاب
لما تقول الكلمه
تفتح للأمل
ييجى الف باب
روحك الصافيه النبيله
بسمتك فى الحزن
إعلان للتفاؤل
مين ياصاحبى
قلبه صامد رغم تكسير المعاول
كلنا بنعانى ياصاحبى
لكن لازم نحاول
يمكن فى يوم تصحى الضماير
يرجع الفجر اللى غايب
يطلع الصبح مجدول الضفاير
تبتسم لينا الصبيه
تفتح ايديها بالمحبه
تبتسم لو حتى حبه
تفرد شراعات المحبه
وتاخدنا جوه حضنها
ماهى لسه عايشه
جوه نبض قلبنا
ما هى أمنا
ومين يخاصم امه مهما
عليه تجور
فرحة عنيها
لما بتناجى الزهور
اللمه وسط الأهل
تخلق ألف نور
هى بهيه وبحبها
كلنا بندور
وطن المحبه والسرور
قلب ابيض ولا بدر البدور
قوم يا صاحبى
نروح لها
زمانها بتدور علينا
فى كل دار م الدور
كلماتى ..
أيمن أبو الدنيا
إهداء إلى صديقى العزيز
الشاعر
حسن بعيله
***********************
***********************
ليست هناك تعليقات:
إرسال تعليق