بداية حلم
• البداية : ..
بتحكي عنّك
وكأنك ...
نسيت أحلامك على الدِّكة
وفي السكة ...
بديت مشوارك كما التايه .
جاى تبعتر بذور الصبر
في أرض بور .
وبتجور ..
على حلم نابت
مولود في حضن صخرة
لملمت من دموع العابرين
كف مَية
بحنية ..
تروي بيه بذرة حلمها الصغيّر
المشروع في دايرة الأحلام
ومين لام ؟
الحلم .. لو شقّ .. الصخر من جوّه
ومين لام ؟
الصخر .. لو رقّ .. لنور الفجر
ولو ..هوّه
حلم نابت
بجناح صغيّر
لملم الطير المسافر
وبيعافر ... يكون له وجود
• العقدة : ...
بتعلمك من الكلام عبرة
ولو فكرة .
ولو فكرة ..
وجود الدود في قلب الصخر ...
منسية .
كما المية ..
ما تطلع أعالى الشط .
وبتحط ...
الوهم شماعة
ولو ساعة ...
تسيب الحلم يتنفس
أكيد هتفوق .
• النهاية : ...
جف التراب
تحت رجلك .. بفعل يديك
وَهْم السراب كما السوس
بينخر في صلب العود
عصاتك ... أصبحت ..هشة
ولو قشة ..
تقصم ضهر البعير .
ولو بتغير ..
اغزل من شعرة الحلم حبال
تقوى بيها .. مجدافك
ولو شافك ...
سواري الشط ملاح
نورس البحر .. يمد يديه
ويرسم شراع مركبك
في وجه الريح
أنا كنت صريح ...
يوم ما دلِّيتك
تحضن الحلم بالقوة
قبل ما تبتدي السكة
تحياتي
خالد العطار
***********************
***********************
ليست هناك تعليقات:
إرسال تعليق