لله يامحسنين لله,,,,بقلم الشاعر أحمد سليم

لله يامحسنين لله
حبة افكار كدا لله
حتى لو بفلوس انا شارى
بس الفكره تخش دماغى
فكره بجد تكون مظبوطه
حاجه تمس القلب صحيح
مش افكار هايفه وعبيطه
بعد يومين يكنسها الريح
فكره تكون من نبض الشارع
فكره تكون عن واحد ضايع
عاش العمر فيها بيشقى
والأخر عايش ف مواجع
فكره تكون عن قلبين حبو
داقو مرار الحب وغلبو
وقبل ياعينى مايقطفو وردو
راح الحب الفقر اهو هدو
شوف الشقه ياسيدى بكام
ولا المهر والفستان
والشبكه اللى عيار كام
الراجل بقى فى مرستان
بدل الحب دا جاله جنان
فكره تكون عن شعب حزين
راضى وشايل همه سنين
وعايشها ف عذاب وانين
بدل الراحه بقينا مجانين
     وادينا عايشين

أفكار أفكار أفكار
مين يبيع أفكار

أحمد سليم

***********************

***********************