الوهم والسلام,,,,,,,,بقلم الشاعر أحمد السعيد الفقي

الوهم والسلام
احمدالسعيدالفقي
سلام
ياأهل السلام
خلص الكلام
ومش لاقي
كلام تاني أقوله
الدم سال
والوهم طال
ومش باقي
غير الضلال
عايشين فيه
زمان بطوله
العمر فات
في الذكريات
والحلم بات
أمل بعيد
وأزاي نطوله
زي السلام
مجرد كلام
نردده ونقوله
لكن فعل مفيش
إمتي يتحقق
يامين يعيش
ومين يصدق
إن الفجر يشقشق
والنهار مايجيش
كانت الدنيا تغرق
في بحور الظلام
ولسه بتقولوا سلام
والحرب اللي دايرة
ليل نهار
والأرض اللي بايرة
من القتل والدمار
والأرواح اللي ثايرة
وحالفة تاخد بالتار
والقلوب الحايرة
اللي ماسكة فيها النار
كل ده يبقي أيه
جد ولا هزار
حرب ولا سلام
والعدو الرابض
فوق أراضينا
عالزناد قابض
وسلاحه مصوبه لينا
من سنين رافض
يعترف بينا
وقلبه بكرهنا نابض
فاكرين ولا نسينا
ولا بنضحك علي روحنا
بأي كلام
وبنوهم روحنا
بالسلام
وفي الأخر
كله كلام في كلام
والسلام
طلع استسلام

***********************

***********************