عيون..... قسمتنا جسد
أمى قالت : من الحسد
ومن الورق عملت حصان
وعروسة كات سن الحسان
عايمه على موج الدلال
فى رجولها طيف خلخال
على أى حال
غرب حصانى وما شرق
وتاه على منقد بخور
ويا الجوى والمستكة
عمال يلف يدور
فى دنيا مفستكه
كات فيها قلوبنا طيبة
والدمعة فينا قريبة
حتى فى ساعات الفرح
كانت تلالى على الخدود
وكنا فاكرينها طيبة
ما فيهاش دود
ينهش فى الحب العفى
والنبض وياه يتكفى
ما يكتفى بأمان
غيرنا ما بيحسوش
أنا لسه فاكر من زمن
غش الوشوش
اللى كنا فاكرينها دهب
طلعت فشوش
فما تحزنوش
على قلب متمرمغ حسد
باعوه هدد
لحقد ناس ما بيرحموش
مين قال ان العيون ما تصيب
وفتحت فى قلبى جروح
وليه ما نجانى الحبيب
وهو نبض الروح
دا الشمس لما تغيب
تهرب سفينة نوح
وأعيش مدبوح
والقلب فيا يشيب
ركبوا على فيل ابرهه
وفرقوا بينا
وتاه الأمان من حضنها
ولا جه وطمنا
وهى من جهلها
زيى ما حستهوش
كنا ضحية زمن
فيه القلوب بيضا
لكن ركبنا الوهن
والحقد والموضة
واحنا يادوب قوضة
بنحبنى على حيطانها
تضمنا بالحب
ونعدى علشانها
ولما شانها الحسد
لقناها بقت أطلال
ويا ناس أندال
من الأهل وجيرانا
عجبى عليك يا زمن
يا مفرق القلبين
بعد ما رفرفوا بالحب
طبوا بدون جناحين
مشينا خطاوى الجبر
وورانا حب كبير
قوموا سلسلوا الليل
اللى مننا بيغير
ورسمنى فى وش المراية
واحد غريب عنى
وقلبى يصرخ ورايا
ولا نبضى طمنى
ولا حتى لحقنى الحبيب
يمسح دموع صبرى
وبيبخرنى بحصان ورق
يمكن علشانه اطيب
***********************
***********************
ليست هناك تعليقات:
إرسال تعليق