كل ليل بيكون له اخر
احنا ليلنا ليه طويل
ليه بيبدأ ثم يبدا
و الوطن لساه ذليل
ايد بتخنق فينا ضحكة
و ابتسام الفرح ضايع
صمت لافف كل حاجة
لما حس الكل بايع
لما شاف امى ف دموعها
دافنة بكره و دافنه بعده
و اما ابويا كره زمانه
و اتعزل ... بيعيش لوحده
و اما اخويا يفوت ولاده
للى رايح و اللى جاى
يخطفوهم .. يدهسوهم
و اما انادى مش معاى
ايه و ليه و لمين هنشكى
و ان شكينا ... هيسمعونا ؟
ما احنا باين من وشوشنا
انهم ببلاش باعونا
لا احنا فوق الحرف نقطة
و لا جنب السكة زير
احنا لقمة و قسموها
م الصغير للكبير
استحلو يدوسو فينا
رغم جرح ف روحنا نازف
يبقى زيد يا ليلنا .. و اطول
طول ما نور الصبح خايف
#فهمى_على
***********************
***********************
ليست هناك تعليقات:
إرسال تعليق