دوبت حظى ف فنجان
واعزمت عدوى عليه
بكى عدوى بالدموع
وقالى جرالى أيه
سألته أيه جرالك
قالى سوده الدنيا ف عينيه
قولتله ودا من زمان
قالى لأ من شويه
قولتله وشايف أحوالى أيه
قالى أنت ميه ميه
والقهوه طعمها أيه
قالى مُره شويه
قولتله سقيتك حظى
لجل تتهنى معايه
من زمان بتحسدنى
ولا أنت دارى بيه
شوفت أيام عصيبه
وما فيها حنيه
وأنت ف الراحه والجايه
دايما بتقُر عليه
دوبت حظى ف فنجانك
لجل ماتشوف بعنيه
بتبص للناس ليه
ياما الهدوم مداريه
مسكين ما جاب عشاه
ولكن مستور بهدومه
تشوفوا تقول مليونير
لكنه شايل جبل
الهم بينهش فيه
ولا عمره صابوا الملل
لا لاقى دوا لهمومه
والأمر عنده جلل
وشه البشوش بيضحك
وتقول دا سكنه ڤلل
ونومه على حصيره
تلاجة بيته قلل
حامد ربه وشاكره
ولا مد إيده وسأل
وأنت بتحسد فيه
سقيتك فنجان العلل
ياريت تبطل حسد
جايز دعواتك تقبل
( أسامه جديانه)
***********************
***********************
ليست هناك تعليقات:
إرسال تعليق