هات الخشب وولع
ويلا ياعمي ادفى
وإكمش كده م السقعة
أصل العشا مش كفى
وهات تعريفة مخرومة
ويلا هـ نلعب رفى
يلا ملك وكتابة
يا كدابة
نوليني القلة
وشيلي الصدا م الحلة
فكي النحس شوية
أرجوكي إديني هـوية
أمشي بيها ف الشارع
أصل الحملة قوية
وأنا نفسي عزيزة شوية
شرقاوي من الشرقية
معروف عنى الحنية
واخد ع الشالية ونارها
وأحب الشاي ف الولعة
وأشرب كرسي معسل
وأطير ف الدخانة
ياغلبانة
يا تعبانة
يا كسلانة
يا همدانة
يا قاعدة ف صالة بيتكوا
من غير ولعـة
تباتي كدة ف السقعة
يا دي الفـقـعـة
من دي الوقعـة
تلاقى الأوضة
باردة وواسعة
تقولشي ف ترعة
فوقي يا قرعـة
شعرك دايماً
زاين غيرك
يا نحيلة وغيرك
واكل طيرك
قولي لابوكي
يقوم يدفى
مون عربيتك يله
وغيّر زيت واتهنى
ورص الكرسي التاني
وشد ف آخر شدة
وإغسل كل العـدة
ولما توفي العـدة
الست هـ تلبس فضة
وتنسى تقوم تتوضى
وتنسى صلاة العـيـد
وصاحبنا إندار ع القبلة
ويخش عريس الغفلة
والواد ف اليوم التاني
وإبتدا يشتاق للدخلة
ومعدشي يهم ننام
والعام يجي بعد العـام
ومدام ف البيت الولعة
يحللنا معاها القاعـدة
وننسى حروف كلمتنا
وسهلة لكل فيران الدنيا
يخشوا يعيشوا ف بيتنا
يناموا معانا ف غيطنا
يا كتاب مكتوب بحروف الجهل
إزاي هـ تفيد الناس
إزاي هـ يكون ف حروفك ماس
وجواهر تتباس
وإزاي من غيرالكلمة الواعية
هـ نفهم معنى
مين يحرمنا
ومين يوجعنا
مين يهدينا
ومين ينفعنا
يا مادنه
عليكي أدان العلم جمعنا
وندانا وقربنا
مين بعّـدنا
مين فرقنا
وبيضرب جمل الصبر الصابر
تحت عـلمنا
يا صخورالحكمة البايتة
التافهة
الخايفة
حالكم يشهد علي أحوالكم
مين غيركم
مين حولكم
وخلى النخوة تفوت أطباعكم
مين بالخنفسة طبعّكم
كانت الجدة زمان تحكيلنا
عن رجالة حافظة عهودها
عن رجالة عارفة واجبها
وإحنا أكيد صدقنا مثلها
إن النار خلفتها رماد
يللي ف طبعك نوم للضهر
قوم اتوضى وصلي الفجر
وإدعي إله العرش يغّير
طبع إخواتك
قوم وإلحق لم حجاتك
فاتك
قطرالصبح أهو فاتك
وغيرك خد مكانك
وعدوك خد حياتك
والرزق إتوزع من بدري
من غير يا خفيف حتى م تدري
وإحترنا معاك يا أهبل
يا إبن الهبلة
إنت الاقرع
واللي أمك هى القرعة
إنت الخايب
وإللى أمك هى الخايبة
وعلي بال م تقوم من نومك
يفوت ليلك ويومك
ويدوب تلحق تتعشا
أو تتمشكح
اوتتمشى
وتلم الخشب الباقي
وتقعد تانى تولع
وتكمش تانى م السقعة
أصل العشا مش كفى
****************
من ديوان
من فوق حصان الوجع
الشاعر
رمضان فؤاد السيد وفا
عضو اتحاد كتاب مصر
***********************
***********************
ليست هناك تعليقات:
إرسال تعليق