سامحنى ياقلبى ظلمتك
وعيشتك سنين مخدوع
حياتنا صاحبها الضياع
وقلبى م الألم موجوع
مليتك بالحنان والحب
سقيتك كاس الخنوع
أمرتك حب كل الناس
ما تفرق بين جنس ونوع
وكان حسك ينبهنى
وتصرخ بألم الدموع
قلوب جوايه خداعه
وآيدالك بالنهار الشموع
شموع الزيف والوضاعه
شعاع الشمس كله سطوع
أهملت كل همساتك
وفضلت أن أعيش مخدوع
وقلت يمكن ييجى بكره
وتتغير عندى المفاهيم
لقيت الكدب صار حرفه
من غير مذاكره ولا تعليم
وشفت الغش بعيونى
وشمس الدنيا صابها الغيم
صبرت كتير على خداعهم
وأرهقتك من الترميم
صبرت معايا ياقلبى
وكنت عليا ياقلبى رحيم
لقيتهم بالأسى داسوا
على قلبى ودوقت الآه
قفلوا على نبضى أجراسوا
وصوت الصمت جوايا تاه
حاولت أفرز سكان قلبى
لقيت الكل بقى براه
ياريتنى فرزت من بدرى
وما دوقت ياقلبى الآه
( أسامه جديانه)
***********************
***********************
ليست هناك تعليقات:
إرسال تعليق