من بعدك يابا...بقلم حسني همام

* من بعدك يابا *
===========
من بعدك يابا مالقيت حنيه
ولا لقيت حد يخاف عليي
أو يسعى يعلمني شئ
في الدنيا ديه
ولا حتى حد يديني هدية
ولا  يشيل معايا
شيلتي التقيلة
ويتحمل معايا الاسية
ولا حد يقلق عليي
لو أنا اتاخرت شوية
عن مواعيدي الأصلية
و يوجهني وياخد بأيديي
للسكة السوية
ولا حد يضحي عشاني
بطيب خاطر
وميحسسنيش بجميله عليي
و يدعيلي باخلاص
ساعة الفجرية
ويتمنالي أكون أحسن منه
في كل شيء بصدق وفاعلية
ولا حد يفرحلي في نجاحي
وكأنه ليه هو مش ليه
و يزعل على زعلي
ويحس ويشعر بيي
ويحاول يخرجني من حزني
بكل الطرق المحببة ليي
ويتعرف على صحابي
ويسأل عنهم
عشان يطمن عليي
ليكون فيهم حد
كده ولا كده
وامشي معاه في سكة بطالة
ويكون الرجوع صعب أوي عليي
ودايما يابا كنت مراعيني
في كل حاجه
في اكلي ولبسي ودراستي
واهتماماتي الشخصية
وبتحاول توفر كل حاجه ليي
على قد ما تقدر
حتى لو جيت على نفسك شويه
أصل كان كل أملك
تشوفني راجل بجد
ملو هدومي في الدنيا ديه
عشان تحس إن تربيتك
جابت النتيجة إللي هيي
ولو سبتني في الدنيا
متبقاش خايف عليي
من بعدك يابا
اتغيرت الدنيا في عنيه
واضطريت بدري اتحمل المسؤلية
من بعدك يابا

حسني همام
جمهورية مصر العربية
24/12/2018

***********************

***********************