كان راجل حر
أحلى سنينه
عاشها ف مر
صوته تملي
كان على حق
ف وقت الحق
ما كان بيسر
عم احمد
كان راجل صادق
حتى ف ضيقته
ما كان بينافق
بكل جراءه
كان بيقول
كلمة حق
لوجه الخالق
عم احمد
كان قلبه شباب
عمر الحب
ف قلبه ما شاب
ولما يقول
نواره و عزه
تقول معقول
ف الحب عذاب
عم احمد
كان حرفه بديع
و عبيره ..
عطر مواضيع
سافر كل بلاد
الدنيا
و حب بهيه ..
ف قلبه ربيع
عم احمد
كان قلبه جميل
ف حب بلاده
قال مواويل
قال ممنوع
وبحبك يا بلدي
كان مصري
عاشق للنيل
عم احمد
كان راجل طيب
و كلامه
من القلب قريب
كان بيعبر
عن أوجاعنا
و كلام قلبه
كان بيطيب
عم احمد
كان غير الكل
وشجاعته
ف أشعاره تدل
عاشها فاجومي
أد ماعاش
ولا يوم واحد
عاشه بذل
عم احمد
وان سابنا
ومات
لسه معانا
وله ذكريات
فيها ريحته
وفيها تاريخه
وحرف صوته
صهيل ثورات
عم احمد
✏مسعد سليم
***********************
***********************
ليست هناك تعليقات:
إرسال تعليق