مش هقول أكتر من كلمتين
ياساكنة جوا نن العين ياشايلة همى سنين وسنين طول عمرك وإنت بتحضنى وتضمى فاكرة ياأمى لما كان عندى سنتين وكنت بتهته فى الكلام كنت تعلمينى ومتزهقيش فيا علام كنت بشوف الفرحة جوا عينيك لما أنده عليك تسيبى اللى فى إيديك وتجينى قوام تحضنينى بقلبك وفى حضن حبك أستخبى وأنام وأهرب من الأيام تحاوطينى بالجناحين وتغطينى برموش العين وتمر السنين ياأم القلب الأبيض أكبر قدام عينك تكبر الفرحة جواك ولو كنت يوم أمرض ياحزنك ياشقاك تسهرى الليالى وتتمنى تكونى بدالى وتدعى يارب تشفى ابنى الغالى وتفرحنى بيه أنا بعمرى أفديه وعدت السنين يا أمى وفرحتى بيا وشلتى عيالى يبقى أزاى يخطر على بالى أنساك ولو لحظة أو حتى تفارقى خيالى أزاى أتصور الدنيا من غيرك وأزاى أيامى تصفالى من غير رضاك يا أمى لا زاد ولا أهل ولا لمة ولا حتى اللقمة تهنالى فداك أنا يا أمى يا غالية ولا غيرك غالى ياساكنة جوا نن العين هقولك كلمتين بحبك قوى يا أمى وحبك تاج على الجبين
احمدالسعيدالفقى
***********************
***********************
ليست هناك تعليقات:
إرسال تعليق