. حضن عيله .,,,,,بقلم الشاعر معوض حلمي

..... حضن عيله ..... ........................... عينيا مالها مدغششه شايف طشاش البيوت مش هيه هيه والأسامي مش عفيه العقول سايقه الطناش كل عقل وله طريق الصديق مبقاش صديق لما غاب الود بينا ضيعنا في البحر الغريق فين زمانك يابهيه فين حميده وفين سنيه حنينا لبيوتنا القديمه فين عزيزه وفين كريمه لما كنا في يوم حبايب والأمان مالي الحواري عالمصاطب في العصاري ضحك جوا القلب ساري والبيوت لمه القرايب غدوه حلوه بلقمه ناشفه وجبنه حادقه وقعب رايب كنا ننده ع اللي غايب أو نشيل لغيابه نايب لسه فاكر ستي حمده كات وتد للعيله جامده كات تنادي وامي نايمه يابنتي راح القمر قومي عجينك خمر وتصحى تحمي الفرن بدري للمشلتت والمعمر والجيران حواليها تسهر كات قلوب الناس عمار والعيال ماكانوش صغار الكلام عفه ووقار كل كلمه وليها قيمه كات وشوش الناس وسيمه النوايا كات تمام والسلام جوانا نام والخصام كان يوم وليله الهموم ماكانتش شيله كنا لمه ف حضن عيله والكبير كان له مقام والكبير كان له مقام ............................... بقلمي الفلاح الفصيح معوض حلمي منشأة بطاش تمي الأمديد دقهلية

***********************

***********************