قصة حياتى .... احمد السعيد الفقى

قصة حياتى
احمدالسعيدالفقى
قصة حياتى
قصة طويلة
مليانة تناقضات
أيام الفرح فيها قليلة
والباقى...
جراح وأهات
وأغرب مافيها
وأنا لسه ببتديها
لما جيت للحياة
الأب فجأة مات
بدون أى مقدمات
وكأنه رافض حضورى
مش قادر
أوصف شعورى
وجود الأب
شىء ضرورى
بيكون  سند
وضهر عليه تتسند
ولما تحتاج مدد
بيبقي هو  المدد
فى أحلك الأوقات
يعلم وينصح
يوجه ويشرح
ولو الدنيا تجرح
يداوى جرحك
ويفرح لفرحك
وتهون معاه كل الصعوبات
من غيره تبقى وحيد
وعمرك ماتبقى سعيد
تفتكره ليلة العيد
جايبلك لبس جديد
ماشيين سوى
والإيد فى الإيد
تفوق من الحلم
على صوت الذكريات
أبوك مات
وهتفضل يتيم
ليوم الممات
تمر الأيام
يوم ورا يوم
تكبر
وتكبر جواك الهموم
تروح مدرستك
تكبر مشكلتك
تشوفها قصاد عينك
كل يوم
كل إبن معاه أبوه
وانت بتدور على أبوك
فى كل الوجوه
وجوا قلبك بتصرخ
فين أبويا
ياناس  هاتوه
ودمعة تنزل على خدك
ماتمسحها غير يدك
لما تلاقى نفسك لوحدك
وسط الزحام تتوه
ينعقد لسانك
وتتسمر مكانك
من سكات
وتمر الأيام من تانى
وتكبر
وتفهم  الدنيا أكتر
توصل مرحلة الشباب
تقفل على نفسك
ألف  باب
ويبدأ عقلك يفكر
ياترى في يوم  هتقدر
تكمل المشوار لوحدك
وإن كليت
مين يقوى عزمك
تبص حواليك
تدور بعينيك
ماتلاقيش غير السراب
ساعتها تعرف
إن أبوك
عن الدنيا غاب
ووراه التراب
تصرخ وسط السكات
أبويا مات
أبويا مات
احمدالسعيدالفقى

***********************

***********************