.............. حكاوي الرعب ..............
....................................................
خالتي صابحه ..
خالتي صابحه مأصله والنفس شبعانه
وقت اما ننوي للصلا نلقاها سبقانا
مالهاش في كيد النسا ولا في المسا تسهر
تنام وتشكر وتصحى وروحها قنعانه
ماراحتش يوم مدرسه ولا دخلت الكتاب
بالحمد متونسه سايباها للتواب
تسرح تروح وشها بيضحك
ممكن تلاقي ومتلاقيش
نسألها مالك تقول مفيش
إيجت وغابت كلها أسباب
خالتي صابحه
كات زي متن كتاب
نقراه يوماتي ونهاتي باستغراب
كات مكتبه مجمعه الأحباب
ساعة عصاري تلمنا وتحكي الحكاوي
عن واد مخاوي يقوم هنا وهناك يبان
وساعات كمان غاوي بيطير في أي مكان
الناس شافوه راكب على منديله
قامت تنادي له
عدى البحور طاير كما الرهوان
وناس شافوه حدا الساقيه في المقياله
والساقيه من غير وابور دايره وشغاله
باين عليه عفريت وله سطوه
أو شيخ ولي صاحب خطوه
ساعتها صابنا الخوف وكنا صغار
جرينا نرمح رمح سدينا باب الدار
جريت ورانا الخاله وهى ملبوخه
لاجلن تطمن قلوبنا اللي لسه خضار
واحنا اللي عيشنا في حقبة الدوخه
نسمع حكاوي الرعب باستمرار
أمنا الغوله ، وابو رجل مسلوخه
وعدى العمر وكبرنا وشعرنا شاب
ولسه الخوف ملازمنا كأنه عقاب
وجينا لزمان كداب
وناس حوله بتلبخ لبخ
إشي عوكل على اللنبي
وعمك بخ
سموم تتبخ في عقولنا
فنتشابه مع عجولنا
تشيلنا رجولنا جوا الفخ
سقونا الهم بإيديهم
في أفلامهم وحكاويهم
وغناويهم حاجات مره
كبر خوفي 200 مره
حضنت حفيدي من خوفي
عملت له قلبي تعريشه
عشان احميه عقول بتسود العيشه
أطاطا وخيشه وحبيشه
وواد هايف بيتنطط كما المسطول
بنص تامول وربع حشيشه ع الشيشه
..................................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
...
***********************
***********************
ليست هناك تعليقات:
إرسال تعليق