البخيل .... احمدالسعيدالفقي

البخيل
احمدالسعيدالفقى
بخيل
ومعذب نفسه
ومعذب أهله معاه
تلاقيه من شدة حرصه
شحيح
حتى فى قولة آاااه
دايما عاقد وشه
والتكشيرة
تملى ملازماه
يضحك بحساب
ويحزن بحساب
ياكل ويشرب
برضه بحساب
حتى لما يتعب
الدوا  بحساب
حتى الهوا بحساب
دايما قافل
على نفسه الباب
وعمره ما بيضايف أغراب
ودى عيشة أيه
دى عيشة هباب
كلها عذاب فى عذاب
وإن حد سأله عن الأسباب
تلاقيه لئيم
ابن الأيه ودحلاب
عنده لكل سؤال
ألف جواب
تحتار فيه
إن كان صادق أو كداب
يجاوبك بكل غلاسة
زى بتوع السياسة
دى فطنة وكياسة
مش بس كلام
أنا دايما باصص لقدام
وعامل حساب الأيام
هو أنا لازم
أبعزق فى فلوسى
شمال ويمين
عشان يقولوا عليا كريم
وابن الأكرمين
هيفدنى بأيه
كلام الناس
لما تضيع فلوسى
وأحتاج وأحتاس
ولا هى منظرة وخلاص
محدش منهم
هيسلفنى ولا مليم
وإن سلفنى
هعيش طول عمرى
فى ذل الدين
يقولوا عليا بخيل
ومعايا فلوس
أحسن مايقولوا
مديون وذليل
قليل البخت ومنحوس
آاكل طقة
وأجوع  إتنين
أحسن ما آاكل بالدين
يامرحب بالبخل
  ويا مرحبتين
أتارى البخل
طلع شئ زين
أحسن من الطفاسة
وفراغة العين
وأهو حتى الورثة
يلاقوا  قرشين
أحسن ما يلاقوا
على أبوهم دين
احمدالسعيدالفقى

***********************

***********************