حَزين جِدِّآ بقلم الأديب مسعد سليم

بِما إنِّي حَزين جِدِّآ
وحاسس الحياه ضِدِّي
وبَكتِب مـِ الوجَع فِعلآ
وبنفي إنَّها وَردي
شعوري والَّه مِن ناسها
كأن القَسوَه إنجازها
وهتضيفُه إلى تراثها
وواخدَه القصَّه كَتحدِّي
انا عَن نَفسي مُش فاهم
ليه همَّا بَقوا قاسين
وكُل ما اقول انا واهِم
بلقاهُم كِتير حَريصين
يظهِروا إنُّهم قِسيوا
ولطيبة زمان نِسيوا
وفـْ بَر الجفا رِسيوا
عن بَر الأمان ضالين
إيه قسَّىٰ قلوب النَّاس
وخَلاها خِلافها مَتين
مين مَرَّر بأيدُه الكاس
وبيضيف عــَ اللهب بَنزين
مين حابب تزيد النَّار
ورافض يشوفها عَمار
وكُل يومين يبث حوار
ومصلحتُه تكون فريقين
يا ناس لسَّاها عــَ الفطرَه
صُونوا ما بقىٰ مِنكُم
وعيدوا النَّظرَه والفكرَه
بلاها مِن يا انا يا انتُم
ما طول عُمرنا إخوات
ولا هَدَمِتنا يُوم أزَمات
ولا دي نهاية الخلافات
فـَ ليه بتغمَّضوا عُيونكُم

                حَزين جِدِّآ
مسعد سليم

***********************

***********************