عينين الروح ..... معوض حلمي

موثقة على مدونتي الشخصية على جوجل معوض حلمي شاعر عامية

.......   عينين  الروح  ........

...................................

البت  المليانه  أماني
بالليل بتخلي الليل مزازيك
بتفتح      بابها    وتستناني
وترخي ستاير  ع الشبابيك

البت  المليانه  أماني
شقت  توب  الخوف نصين
قالت  هو  نصيبي  وجاني
وساكن  جوا  حبابي العين

البت  المليانه  أماني
زي  عروسة  البحر  الرايقه
بتجري في  نبضة  شرياني
هى  صفايح  دمي  وعايقه

البت  المليانه  أماني
أحلى     قصيده     بتتسطر
تتمايل  على  صوت ألحاني
فتهز  سحاب  الروح فيمطر

البت  المليانه  أماني
في   عينيها  السحر   مدافع
لو  مجني عليك انت الجاني
ولاتقدر    تشكي     وتترافع

البت  المليانه  أماني
صفصافه  وطرحت ضليله
بتحاجي  على   وحرساني
بتثبت     آراكان      العيله

البت  المليانه  أماني
بتعافر     وتصد       الريح
وبتقلع     نبت     شيطاني
بحنانها  السارح     تسبيح

البت  المليانه  أماني
على  عرش   القلب  راسمها
لو    قلت    الآه   ومعهداني
مابيني    وبينها     بنقسمها

البت  المليانه  أماني
محلوه   فعيني    بتقاسيمها
لو  تضحك   سعدي  بيملاني
وتملاني     بسحر     نسيمها

البت  المليانه  أماني
من   بدري    بتسرح    ويايا
بتسند     ضهري     مهوداني
بتحوي    لأوجاعي    حوايه

البت  المليانه  أماني
دي   غزاله   كعوبها   محنيه
باجيب     الفرشه    وألواني
وارسمها      حمامه    بحنيه

البت  المليانه  أماني
طارحه   سنابل   ورد  ونور
تملى  الحاصل   بعد  التاني
لاجل  هلالي   يبان  مستور

البت  المليانه  أماني
هل    هلالها    كبدر     بدور
نامت  عصفوره  ف أحضاني
خضر    تاني    الحلم   البور

البت  المليانه  أماني
دايبه في روحي وأوصافي
وانا   دايب   وبكل   كياني
عاشق  بحر هواها الصافي

البت  المليانه  أماني
طارت   عصفوره  وبتزقزق
حنت     لطراوة     أغصاني
حطت  على  قلبى   فرقرق

البت  المليانه  أماني
جوا       البرواز       سنيوره
وانا جاهز على ضهر حصاني
أخدها   واطير  ع المنصوره

البت  المليانه  أماني
بتمسح  أي جروح في الروح
بتحني  نجوم  الليل علشاني
يتسرسب مني العشق وابوح

البت  المليانه  أماني
بتصحي  العاشق  لو  مدبوح
بتعزف   ضي   عنيها   آغاني
وتزرع  روحها   عبير  بيفوح

البت  المليانه  أماني
زي    الفجر    يهل   صبوح
بتغزل    م  الحب     معاني
وتملى  حناني  كورد الدوح

البت  المليانه  أماني
بالنسبالي    كتاب    مفتوح
بتلملم  في   هواها   الحاني
وتمنع    عن   روحي  النوح

البت  المليانه  أماني
بتمسح      أحزاني     تروح
عدت   على   بذرة   تحناني
نسمه  عليله  تداوي  جروح

البت  المليانه  أماني
منعاني  أفكر   يوم   بجنوح
بتسد     عيوني     وعمياني
عن إني أميل لسواها واروح

البت  المليانه  أماني
رصتلي بناني العش صروح
مبروكه   وسكنت    عنواني
شيلاني ف نن عينين الروح

البت  المليانه  أماني
شيلاني ف نن عينين الروح
...................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية

***********************

***********************