حشاش الحشاشين. بقلم الأديب بسيوني صديق

منواوج / حشاش الحشاشين
*********************
قاعد سهران ع القهوة   
مستني الشلة الفاسدة
و عاملك دوشة وربكة
وجيوبك فاضية ياحسرة
وحياتك ملهاش لازمة
ضايعة ف لعب الطاولة
ياحشاش الحشاشين
****************
ودخلت الجامع قلنا
ربنا هداك تنفعنا
وأتاري هدايتك لحظة
تختارها وقت اللازمة
يا مجنون المجانين 
روح ألعب لعبة غيرها
ياحشاش الحشاشين
****************
ويجي رمضان تتحضر
وتلبس جلابية وعمة
وتعمل فيها شيخ أزهر
يضلالي فين الذمة
وحياتك كلها بتهزر
ماتشوفلك لعبة تانية
ياحشاش الحشاشين
*****************
مراتك تلطم بالساعة
وانت ولا شاغل بالك
وعيالك منك فزاعة
يأبو الحكايات كدابة
عامل مسطول وتحور
ياخي روح ضربة تغمك
يا حشاش الحشاشين
*****************
ويجي العيد وكأنك
جاي من كوكب تاني
عبيط ولا بتستعبط
وعاملي نفسك ناسي
ومطنش النقدية
وقاعد في الارض مبلط
ياحشاش الحشاشين
*****************
الناس المزاجاتنية
صاحبة الكيف والقهوة
مش حاسة بالمسئولية
وزي العربية الراكنة
ودخلنا ياناس ف قضية
ورجعنا لنفس النقطة
ياحشاش الحشاشين
******************
صدرك بقي طبلة
أتهري والهرية باينة
وراح عمرك أونطة
وخربت البيت ف ثانية
من السيجارة والمزة
الله يلعن الكيف
ياحشاش الحشاشين
******************
يا خيبة وشايلها جمل
ألف خسارة عليك
ضيعتنا وضاع الأمل
عالة و خسارة فيك
أكلك وشرب المية
يا واكسة وعلينا ناكسة
ياحشاش الحشاشين
 ****************************
 بسيوني صديق

***********************

***********************