يسرى الصلاحى

مجتش الدنيا مدلع
ولا كلت ف طبق فضة
مخاصم راحتى من صغرى
وحلمى من العرق صدى
سمعت ان الفلوس بتطير
عملت من الأمل جناحات
صنعت من الى فات مركب
غزلت شباكى م الجايات
 بحار الصعب عديتها
وكان الصبر مجدافى
وتاهت راحتى ع المرسى
سندت الحلم بكتافي
شوارع عمرى لفتها
وليه ع الرصيف حكايات
حروف العشق نقشنها
ولما قالت لى نبقي اخوات
ويوم ما حضرت زفتها
ودمع عينيها بيشاور
لشنطة حزن عبيتها
وفايت حلمى ومسافر
ف رحلة عمر مكلومه
وحضن انانى مش دافى
نسينا نعبى فرحتنا
رصيدها معانا مش كافى
حبال الحلم مرجيحه
ملاهى ف حارة مهجوره
وسيرك مقاطع الجمهور
اسوده سنانها مكسوره
ومكسوره يا عين الحق
تباتى تملى مقهوره
وناس م الظلم بتكرش
وسارقه الكدر ف الصورة
فى سكة خوف ودوامة
طريق و نهايته مسدوده
قصة عمر ممسوخه
واوتار حزن مشدودة
بتعزف لحن مش واضح
ونوته قديمة مقطوعة
فتوه ف اخر الحارة
وكلمة حق مسموعه
دقه زار وشخليله
بيانولا وراها عيال
بتعرض فيلم حدوته
نهايته قصة مكتوبه
بان
الراحة راحة البال
يسرى الصلاحى

***********************

***********************