الأمان وتراب الوطن | للشاعرة| شرين الدماطى| عزف الأقلام

الأمان وتراب الوطن
كان النسيم يهل
فيجيب معاه الدفا
وأنامل قلوبنا تتحد
وتخبط ع البيوت
وبيوتنا أبوابها مفتوحة
بعد أبواب ربنا
واحنا العصب
حتى لو بينا حدود
والأخ دا هو السند
وانا وانت ساندين بعضنا
ميهمنيش غير الأمان
وتراب الوطن
واللي اتضح
كل اللي فينا بيتمسح
مفضلش الا حاجات بسيطة
أحلام وتاهت مننا
متحققيش حلم غيرك
كله شتات
وأصبحت ريحة النسيم
ريحة عفن
نعش وكفن
واحنا ف ثبات
ف سكوت طويييييل
صوتنا عويل
والجبن عشش قلبنا
والقلب مات
كله اتكتم
أما العيون
نظرتها لتراب الوطن
معجون بدم
ميت الف هم
كل البلاد اتفرقت
وقعت ف فخ
لسه الوطن مليان مغانم
والذئب طامع
والكل بيروح سرسبه
صوت النعيق عامل صدى
مالي الفضا
سحابة غايمه ف السما
تحدف سواد
وكأنه عداد واتفتح
علي البلاد
عداد دمار
كهف السواد ف مخهم
جرفوه علينا
وأصبحنا احنا تجربة
والدور يدور
بيقطموا كل الفروع
والخطة جايه ع الجدور
شريان حياتك لسه صاحي
رغم الأضاحي
قربان فراتك اندبح
اصاد عنيكي
وانتي لسه متخدرة
وبلاد شوامك
دخلت نفق كله سواد
وادي غزة وسط النار
مش لاقيا باب
باب للنجاه
ادعوا الاله
يا أرض يا طيبة
احمي جدورك
احمي جدودك
احمي التاريخ
اللي بينسبوه للفضا
مبقاش صديق
غير ابنك انتي
وغير ابوكي
وبعدهم كله عدووو
يا بلاد غريبه
وقريبة من بعضكم
شيلوا الغطا
وبلاش تناموا وصحصحوا
مش عاوزه اقول
يلا السلام
على أرض اهلها
لسه نيام
شرين الدماطي

***********************

***********************