حبك حياة| بقلم | أيمن أبو الدنيا

حبك حياة
كانت بتحلم باللقا
وانا كنت باحلم بالفراق
البحر كان غريق وانا
فى بحور هواها عايش سباق
الموج بيتحدى العبور
وكأنه سد بيمنعك
انك تفكر فى الوصول
وانت فى وسط الموت
بتحلم بالحياة
صعبان عليك انك تفارق حبها
أو يوم تصرح انك انت مش لها
صعبان عليك دمع العيون
ينزف فى قلبك حبها
وتقول لها
البسمه فى عيونك سكن
وانت الأماكن كلها
انت الوطن
فجففى دموعك
تجف الدمعه فى عيونى واتبسمى
تبتسم آهات النبض فى قلبى
وانسى الفراق
بكره الغياب راجع بفرحة للقا
يا بحر مليان بالمواجع
مدى الإيدين واستقبلى
قلب الحبيب
نبض المحبه فى قلبه
رغم الحزن راجع
يا ساكنه نن العين
حبك وطن
وازاى يغيب
عن قلبى حبك مهما فرقنا الزمن
ما انت الأمان وانت الوطن
مدى الإيدين من تانى
وانشلى قلبى يا طاهرة م الغرق
فكى الأسير .... ابنك أمير
الأصل مصرى
وفى ومخلص للوطن
والحلم طول العمر
يسكن جوه قلبك
قلبك حياة
حضنك سكن

أيمن أبو الدنيا
٥/١/٢٠٢٠

***********************

***********************