حالة ضعف| بقلم | الشاعر / علي فراج

لما الزمن يقوي عليك
ويشمر عضلاته
ويزأر في الوش
ألوان متخاويه
وإن عفيتك وهنت
مش قادرة
وإن الضهر الساند عمرك
نخ .. ..
تعرف إنك خلاص
واقع في الفخ
إيش تعمل والعود إتمص
والعضم يادوبك
علي واحدة ونص
إن مال التيار
يتجن المخ
وعجز القهر
كالمطرة ترخ
والهمة محتاجة بخور
ودقة زار في الدار
والجن الجاهل بخ
علي وشك مليون وش
فالكل إتجاهلك
والهمس مابينهم عاتبك
تنساب ويهرب عمرك
وتصارع مع نفسك عجزك
وتهجر أحبابك عشك
ولا حد راح يذكر عزك
يمكن تتحايل دعوة
مخزونه زمان من والدك
تعافيك وتعافي الضيق
المتعافر جوه في صدرك
وتعرف إن الدنيا هناك
وحقيقتك مفرودة تراب
والعقدة تتحل في قبرك
........................
الشاعر / علي فراج /

***********************

***********************