امبارح قعدت مع مسؤول في الفندق، قال لي أنه معاهم مديرة ألمانية بقالها أربع شهور مش عارفة تروح بلدها، ولما خاطبت سفارة بلدها ردت عليها بعد فترة طويلة وقالت لها حتسافري بشروط :
تدفعي مبلغ 6000 دولار، والحجر الصحي بيكون في مخيمات في المطار لمدة 14 يوم!!
نفس الأمر منطبق على هندي شغال معاهم في نفس الفندق ( سميراميس انتر كونتيننتال)
يعني الدول كلها بتعمل كده، لأن المصيبة كبيرة، والعالم كله بيعاني منها اقتصاديا، وللعلم مصر عملت رحلات حجر مجاني على مريديان المطار ومرسى علم، والكل كان بيعيط عشان يفتحوا المجال، والحمد لله اتفتح بنظامين :
حجر مجاني على المدن الجامعية، وحجر بالفلوس للي ( معاه)، وللعلم والله كنا بنحلم بس نشوف طيارة ماشية في السما زي العيال الصغيرين، والحمد لله فتحت، انا بقول كده ليه؟
للأسف ( بعض) المصريين خدوا على ( الولولة) وكتر ( الشكوى) وتلاقيهم مع أي مشكلة مهما كانت ( بسيطة) بيحسسوك انهم ( غلابة) وإن مصر بلد من الدول العظمى و عاملة نفسها فقيرة!
انا دفعت تقريبا 4000 ريال عشان انزل، حسبتها ازاي؟
قطاع الطيران والسياحة والموردين والعمال وما يستتبع ذلك من خدمات موقوف حالهم من 3 شهور، ايه اللي فيها لما أعتبر نفسي بساعد الناس دي كلها؟ هوه ليه انت وغيرك ميقولش ان دي مصيبة حطت عالعالم كله ولازم نتحمل؟ انت ليه معتبرها مشروع بيكسب علطول، عارف ليه؟ عشان انت خدت على انك تاخد وبس، ما تديش، اخدت على انك تنتقد وبس وف نفس الوقت معندكش حلول.
ولما جينا لقينا نفسنا في فندق 5 نجوم، خدمة الترا محترمة، رعاية صحية، اكل نظيف، بيقولوا لك احنا خايفين عليك وعلى أولادك وعلى عيلتك، واللي بيشكوا فيه بيعملوا له تحليل pcr والاسعاف اللي واقفة قدام الفندق بتاخده على أقرب مستشفى للعزل، وواقف في خدمتك ناس من وزارة الصحة والسياحة والامن الوطني، عاوز كل ده مجاني؟ يا اخي والله عيب عليك وعلى الشنب اللي في وشك ده!
اي حد مسافر بره بيكسب ومعاه، واللي يقول غير كده (كداب)، بس هوه مش مستوعب ان دي ( مصيبة)، يا اخي قدر انك راكب عربيتك وقطعت إشارة، واللي مش في بلد زي السعودية لازم يعرف ان قطع الإشارة غرامة 3000 ريال، بيدفعهم زي الباشا، ممكن ده يحصل لك، ولو ممعكش عربية ممكن تعمل مصيبة وربنا نجاك منها ، وعشان تاخد الأجر قدر إنك بتساعد ولاد بلدك، بلاش اقول تساعد بلدك عشان بعض الناس بيركبهم عفريت لما نقول كده.
انا عارف ان كلامي شديد، بس من قرفي من اللي كمية العويل والولولة اللي بشوفها، يا اخي انت القرش غالي عليك اوي، وما عندكش ثقافة ان القرش ده جاي عشان يسعدك، مش عشان تحرسه ويستخدمك كخادم ليه، لو معندكش الثقافة دي ( اسكت) لغاية متروح مصر مجاني.
فيه ناس ممعهاش، بس المسؤولين هنا ممعهمش منخل عشان يعرف اللي معاه واللي مش معاه، واللي مش معاه يستلف ويمشي واهو كسب كتير، مش مشكلة لو جت في شهرين خسارة، يا اخي نفس الناس اللي بتشتم البلد في الحلوة بيستنوا لها كبوة عشان يزيدوا في الكراهية.
اللي شبعان بيبقى شبعان من بيتهم، واللي عينه مليانه بيبقى واكل على طبلية ابوه، اما العويل ده ربنا يشفيه ويعافيه.
انا من كتر القرف اللي بشوفه خرجت من كل الجروبات بتاع ( المولولين) اللي اتعملت عشان السفر.
فكوها خللي ربنا يفكها على مخكم وتفهموا الدنيا ماشية ازاي!
***********************
***********************
ليست هناك تعليقات:
إرسال تعليق