لحـظـة عطـش
إيه اللي اتغير جواي ..؟
خلاني أفكر مليون مره
قبل ما أخطي
عراني من خلقاتي العطشانه
لألوانها الباهته
ورماني في حضن الخوف
إيه اللي اتغير ..؟
خلاني مش عارف نفسي
أنا أنهو ف كل التايهين ..!
أنا واحد
ولا كتير لملمهم جسمي وسكنوني
وبقيت برايّ
إيه اللي اتعير جوايّ ..؟
فتفتني حاجات وحاجات
بتخاف من بعضيها
وسقاني كتير
لحد ما عطشت كل حواسي
لطعم الموت
خد صدري بعيد
خباه في الوجع النايم فيّ
إيه اللي سافر فيّ ..؟
لسه مش رجع ..
إيه ...؟!
مغلوب علي أمري
ولا انتفاضة دمي
لسه معشماني بالرجوع
مسلوبه مني الأسئله
ولا الكلام في الحلق مستسلم
وراضي بالسكوت
أنا ضهري مادد حيله
ولا المنحني شكلي
إيه ..؟
التفسيرات الممكنه
حولها شكلي للجنون
والحلم مكسور الجناح
بايت في عشه في الخلا
رعشة إيديه
بتخدني للشمس اللي غابت من زمن
خلتني أتمني يموت
يا يموت يا أموت
الحاله واحده
والمعايشه كلها شكلي
لحظة جنون الأسئله
الشمس بتغيم
لكن ما بتمطرش
والحلم ما بيخرجش من كفن الغروب
وبحاول انزع مني خوفي
ألقي انتفاضة دمي
لسه معشماني بالرجوع
فأتوه مع اليوم المسافر للحنين
وتخدني نفسي للبراح
اشتهي سكة رجوع ..
.
.
ابراهيم حامد
***********************
***********************
ليست هناك تعليقات:
إرسال تعليق