حلم شاعر
####
شيلوا من ع القبر أسمي
وأكتبوا علي القبر شاعر
جمعوا قصايدي الجريحة
وأبنوا بيها أعلي شاهد
جمعوا سنيني اللي سافرت ف الحياة
ما خدتش عايد
غير مطبات الطريق
وسهام في ضهري من الصديق
وخيانة من أغلي الحبايب
أرسموا الحلم اللي كان دايما يجيني
كنت أشوفه غريق في نيلي
أرسموه شراع للمراكب
اللي ضلت الطريق
أرسموه شمس طالعه
ع الفراش اللي بيصرخ
جوه في شباك العناكب
أرسموا بيه اي شئ
بس حاولوا تلونوه
بلون بعيد عن قصايدي
اي لون فيه بريق
لونوه بضي القمر
أو بلون شبه المطر
لون يصحي الفرحه
اللي دفنت توب زفافها
لما زاد ظلم البشر
وشيلوا من ع القبر أسمي
وأكتبوا ع القبر شاعر
عاش كما الأرض اللي يبست من زمن
عاش بيحلم بالوطن
عاش بيحلم بالمشاعر
محمود احمد رمضان
***********************
***********************
ليست هناك تعليقات:
إرسال تعليق