الشعر مش فذلكة
ولا فبركة وتهليل
ولا علم فاقد اصول
المعنى والتحليل
وعشان تكون الدليل
فى الفن والابداع
على شراع الادب
تلقى الحياة قنديل
الشعر بالموهبة
ياخدك ويعلا بيك
وف ننى عين السما
تتملا من معانيك
وتدور عليك النجوم
وفى ضيها تخبيك
والصورة تصبح قمر
والسيرة تبقى نيل
**************
الشعر ما كتبنيش
ولا كنت خدامة
ولا هزنيش قوال
إلا بالهامة
الشعر انغامة
بتمس حس الروح
ساعة يكون البوح
متحلى بالصورة
الشعر عصفورة
فى خيالى بتزقزق
الشعر مش اسماء
خاوية وبتلزق
دواوين بتتبعزق
لاطعم ولا ريحة
الشعر مش ريحة
على البدلة والفستان
الموهبة بستان
والعقل فية خولى
الشعر متفصل
منقاس على طولى
يا طبولى ما تقديش
انا فى الحياة درويش
وباعيش باحساسى
حب الوطن كاسى
واساسى نور على نور
قلبى كما البنور
روحى قصور للخير
والطيبة عنوانى
الصبر داوانى
وشيطانى ماغلبنيش
الشعر ماكتبنيش
ولا خط دواوينى
ولا كنت يوم ملكة
ولا قولت عدينى
انا اللى علمتة
إزاى ينادينى
واديتة من عمرى
اشوافى وحنينى
وانينى كان الحان
غناها موالى
انا والليالى صحاب
داب السهر فينا
الفكر حيرنا
وعبرنا مآسينا
ورسينا ع المقسوم
جوة القدر بنعوم
والمرسى اخرتنا
عزتنا هى الفصل
والاصل عزوتنا
الشعر لحم ودم
شارب ملذاتنا
الشعر كلمتنا
الشعر حكمتنا
الشعر ثورتنا
الشعر قاضينا
***********************
***********************
ليست هناك تعليقات:
إرسال تعليق