مش مستاهله خناق الدنيا
ولامستاهله نقطع بعض
مهما هاتعلا هاتفضل دانيه
واحنا بشر من طين الارض
يبقي ازاي الطين يتباهي
يطلع..ينزل يفضل طين
نفخة روح اديتله وجاهه
آه لو فهموا البنى آدمين
ربك لما خلقها .. برحمه
وأمر يبقي سماح وتراحم
واحنا بقينا ف وسط الزحمه
زى وحوش جايه بتتزاحم
اللي بيملك مال بيسود
واللي معاه القوه يقش
غابه وفيها نمور وأسود
تنهش لحم اللي مايقدرش
ياللي نسيتوا حساب الآخره
فيها صحايف فيه موازين
توزن وبمثقال الذرّه
وتشوف يومها سعيد وحزين
اللي يسامح اخوه من قلبه
يبقي حقيقي دا نعم العقل
واللي يخالف دينه وربه
يبقي ف نار وده شيء مش سهل
تعمل ايه لو كنت مكانى
وتشوف حقك منك ضاع
وللا ازاي هاتسامح جانى
جه حولها معاك لصراع
ـــــــــــــــــــــــــــــــــــــ
حسبي الله ونعم الوكيل
***********************
***********************
ليست هناك تعليقات:
إرسال تعليق