فتًحت عيونى لقيت جمبى
ست الحلوين
وهواها النبض اللى ف قلبى
ورموش العين
بتمد ايديها الصُبحيه
بالخير .الطارح حِنيه
للطرح الطارح ف مطارح
وف قلبه حنين
فتحت عيونى وكان عمرى
يوم ولا يومين
على طلة... نن عيون أمى
أغلى الغاليين
وعيونها ......دايما سهرانا
بتشوف مصالحنا وترعانا
وبتدعى المولى اللى خلقنا
يحرس م العين
ان لمحت عينها دموع عينى
تسأل من مين
وبإيدها الطاهره بترقينى
من شر العين
وان لمحت فرحه بتتعايق
فوق خدى الوردى لدقايق
اسمع قلب امى بيدعي لى
يجعلها سنين
مين غيرها يا ناس كان بيشيلنى
وانا لسه جنين
مين غيرها ......حنانها بيأثرني
ست الحلويين
د انا قلبى ما حبش غير امى
مطرح ما بكون بتشيل همى
نوارة البيت..... اللي بيطرح
ورد وياسمين
**********************
رضا ابو الغيط
***********************
***********************
ليست هناك تعليقات:
إرسال تعليق