أنا باعترف
جوايا طفل عنيد قوي
يغضب أوام
يفرح أوام
وبينسجم ف الحال أكيد
لو حس طعم الإهتمام
أنا باعترف من غير كلام
إن ف عيوني السر بير
وعنادي خط احمر كبير
أبعد أكيد
أرجع أكيد
وابقى ف مكان وأروح مكان
عصبي المزاج غاوي النقيض
وحاجات كمان أكتر كتير
أنا باعترف طفلي الكبير
مش سهل إنِّك تعرفيه
لكن أكيد لو تفهميه
ح تلاقي فيه ..
شلال طيابه بينفرد
ويغذّي دنيا من الأمان
وتلاقي فيه نهرين حنان
رغم التمرّد والعناد
م انا قلبي يشبه سندباد
ممكن يخوض بحر الضلام
لجزيره خاليه من البشر
ويعيش أمير
ممكن يعود عيّل كبير
يعمل حصانُه من المطر
ممكن يدوس فوق الخطر
ما يهمهوش إيه راح يكون
بيسوق عناده ع الجميع
ويسوق على نفسه الجنون
أنا باعترف جوّايا كون
مالهوش مثيل
وعنادي يشبه للنخيل
ما يخافش م الريح لو أتت
لو فيكي روحي اتشعبطت
يبقى اعرفي
ف الوعد ح ارفض تخلفي
واتعلمّي ..
إزاي تكوني شئ جديد
قادر يعيد معنى الغرام
ويدوب ..
ف عشق عنيد قوي
سيد منيرعطيه
عضو اتحاد كتاب مصر
من ديوان ((قلبي مُجرم))
***********************
***********************
ليست هناك تعليقات:
إرسال تعليق