افرد شراع المركبه
واتحدى كل المعضلات
إبدأ ف سرد الأجوبه
وإعلن بقى موت السُكات
لا الوقت ينفع فيه كسوف
وللا هو عصر ....المعجزات
وان صاب كلامك
يوم خسوف
أؤمر تغنى له البنات
وتشيل عشانه ف حضنها
كاس الدوا للي انكوي
وتطعمه سكر نبات
حدد بأملك موقفك
وامسح بأستيكتي الآهات
وواعي الهموم دى توقفك
وللا حتى مُر الذكريات
غَير مسار المنحنى
اللى إنتنى
بين خُد ....وهات
وإبدأ طريقك من هنا
من فوق ضفاف ست البنات
واختار لحلمك موقعه
وافرد له ميت مليون بساط
واقرأ ف آيات سورة الفلق
من شر كل النفاثات
يا من دني منه القلق
واتهز من غول الشتات
لو فوق كتافك كوم زعل
ارميه وعدى ع اللى فات
ومن تراب أرض الأمل
اتحنى منها الأمنيات
**********************
كلمات / رضا أبو الغيط
***********************
***********************
ليست هناك تعليقات:
إرسال تعليق