احمد رجب بدوى نجل صاحب مدرسه الرضوى والتى تم دهسها تحت عجلات اتوبيس المدرسه وقد تم الحكم بالحبس 5 سنوات مع الشغل لكلا من السائق والمشرفه يروى تفاصيل ماحدث وكتب عبر حسابه الشخصى
السلام عليكم تسمحولي اتكلم واوضح القصة لحضراتكم انا ابن اللي فجاة بقى مفسد في الارض وقاتل مليكة الحكاية ان المشرفة اتصلت بالوالد وبلغته ان فيه طفلة كانت شايلاها وهية نازلة بيها من الباص وقعت بيها والبنت دماغها اتفتحت شوية تليفون تاني دي خبططها عربية وابتدت المشرفة تطبخ الموضوع مع السواق شوية وعرفنا ان البنت ماتت انا كنت قاعد جمبه وكان هيتجنن ويعرف الحقيقة مش مقتنع باللي بيتقال اتصل بالمشرفة قدامي واعدم ابنى لو فيه كلمة بقولها غلط وقالها بالنص ابوس ايدك قولي الحقيقة قالتلة هوة اللي انا حكيتهولك يعني الوالد وحضراتكم لولا الكاميرات مكناش هنعرف اللي حصل بعدها جاله تليفون ان تحريات المباحث بتقول ان في تفريغ كاميرات وهنعرف اللي حصل وبلغونا بعدها ان الباص هوة اللي داس عليها يعني الوالد عرف انه الباص لما التحريات جابت الفيديو بليل اسالو نفسكو قال للسواق روح اغسل الدم ازاي وهو ميعرفش اللي حصل اصلا ؟!!! تاني نقطة الوزارة لما سالته سبب الوفاة كان بيبلغهم كلام المشرفة ثالثا لما الوزارة سالته البنت اللي توفت في سنة كام ؟ قالهم مش متسجلة مستمعة عشان دون السن القانوني ومفيش بيبي كلاس في المدرسة وواخد الطفلة خدمة لجدتها اللي شغالة مديرة لمدرسة الرضوى ١٤ سنة كلامه ورده على الوزارة مش معناه انه بيرمي البنت او بيتنصل من المسؤولية بيعرف الوزارة وضع البنت في المدرسة ولما قال مباخدش منها مصروفات عشان لو بنت مش مسجلة ودفعت مصروفات دي جريمة يعاقب عليها القانون يعني كل اللي فات يخص الوزارة مش كلام موجه لاهلها ولا للراي العام ، رابعا بتقولو زور تقرير المستشفى انا دكتور بشري وبقولكم مفيش دكتور تجيله الجرأة يعمل تقرير غير اللي شايفه ويعرض نفسه للمسؤولية نفترض ان كلامكم صح ومسنود وواصل وعمل ده ليه مشفناش التقرير المزور كلنا ؟ !!! وبعدين هيزور ازاي وهوة مضحوك عليه زيكو بالظبط ولولا الفيديو مكناش كلنا عرفنا حاجة خامسا بمجرد ماعرف ان الباص اللي دهس البنت اتصل برئيس حركة الاوتوبيسات وقاله سلم السواق والمشرفة للقسم والباص اللي اتعمل بيه الحادث واتعمل محضر في نفس يوم الوفاة بالواقعة ، تفتكرو في انسان عنده مشاعر ممكن يقول لسواق عمل مصيبة في كيانك ومستقبلك روح اغسل الباص الاول من الدم ؟ بقاله ٤٥ سنة بيخدم في التربية والتعليم وهوة اصلا تربوي مش تاجر او فاتحها للبيزنس زي ماكله بيقول ابتدى حياته مدرس وكافح واتغرب وبنى نفسه بنفسه ليه كل الهجوم ده ليه مع اول حادث ننسي تاريخ طويل المدرسة دي مخرجة دكاترة وظباط وطلع منها ناس مرموقة في المجتمع ليه بنحارب اي انسان ناجح مجاش الدنيا لقى ورث ولا تاجر في السلاح ولا عمره ماعمل حاجة ضد القيم والمبادئ في النهاية اشهد الله ان كل ماذكرته هو الحقيقة وان هذا الرجل ظلم وكثرت الاقاويل مع العلم انه لو كان مدان ومتواطؤ مع القتلة كان ولابد من ان يسال ويوجه اليه اصابع الاتهام في النيابة لان القانون فوق الجميع ، انا اقسمت بحياة اعز مااملك وهو ابني ان دي الحقيقة ولو فيه كلمة كدب ربنا يحرمني منه وياريت اللي مش مقتنع بالكلام اتمنى مايكونش فيه تطاول او اساءة واسف للاطالة وشكرا لحضراتكم
***********************
***********************
ليست هناك تعليقات:
إرسال تعليق