لسه قلبي بيعشقك ..... نيفار أحمد عبد الرحمن

قصيدة/لسه قلبي بيعشقك
بقلمي/نيفار أحمد عبد الرحمن
****⚪*⚫*⚪*⚫****
سألوا الحبايب عننا
قالوا عاشقين

قُلت الغرام مش حظنا
قالوا أنت مين

أنا اللي دوبني الهوي
صبر وأنين

أنا اللي مجروح والدوا
مُرّ السنين

أنا اللي علّمت الغرام
معني الحنين

يا حبيبي

لو تطول بيك الليالي والسهر
دايب حنين

لو في يوم النوم يخاصمك
والعنين دول نعسانين

لو يتوه الفكر منك بين شرودك
والأماني محرومين

لويغيب عنك زمانك أو مكانك
وأنت متقيد سجين

لو تجرب تبقي ذكري
جوه ليل المجروحين

آه ياقلبي

لسه سامع صوت أنينك
وانت مش داري وحزين

تفتكر كلمة بحبك
يختفي بيها الأنين

عمري ما اقدر أنسي صورتك
وأنت بداري الحنين

تفتكر أنا ممكن أقسي
علي حبيته سنين

لسه عيني شايفه غيرتك
والغرام في الشوق دفين

تفتكر هقدر أسيبك
لحظة تبعد لو يومين

عمري ما أنسي إنّي حبيبك
وإنّ دايبة فيك حنين

تفتكر أنا ممكن أبقي
ذكري ليل المجروحين

صعب جداً ع اللي حبك
إنه يجرح بس لين

بس برضه بعشقك
يلي قلبي صدّقك

والغرام والشوق في قلبي
مستعد يغرقك

والحنان ساكن عواطفي
نبض شوقه يحرقك

عيش معايا جوه حضني
أوعي حزنك يسرقك

دي الليالي وأنت جانبي
شوق هواها بيسبقك

يلا نبدء فرحة غالية
شوق غرامها بيعشقك

أنا بعشقك

بقلمي/نيفار أحمد عبد الرحمن
ملكية فكرية مسجله باسمي
حقوق النشر محفوظة بإسمي
رقم الايداع/885213/2019

***********************

***********************