مش كل من هب ودب
يفهم ف معنى الحب
واللى يعمل نفسه تقيل
راح يدوق م العشق الويل
وبكره يتكعبل ويطب
اقروا ف تاريخ العشاق
وازاى دابوا من الاشواق
لو ماشفوش بعض ف يوم
عينيهم ما تدقش النوم
وتعدى الليلة ف حزن وكرب
اوعى تقول انك حبيت
وهافكرك لو انت نسيت
لسه يا بنى بدرى عليك
متستعجلش الله يخليك
قبل ما تنوى قوله يا رب
اوعى تعمل فى الحب معلم
وتعيش حزين ومبلم
او تعمل فيها استاذ
وتشرب من مر الكاس
ولا ينفع فيك دوا ولاطب
يا ما شفنا واد مفعوص
قال بيدى ف الحب دروس
ويالف م الخيال حكايات
عن نزواته مع البنات
وازاى بيطير من قلب لقلب
ده الحب مالوش كبير
ولا يعرف غنى ولا فقير
قدر مكتوب لابد منه
مين فينا مسمعش عنه
واللى يقول محبش كدب
***********************
***********************
ليست هناك تعليقات:
إرسال تعليق